ເຈົ້າໜ້າທີ່ ປກສ ເມືອງ ໄຊທານີ ເຂັ້ມງວດຕໍ່ກັບການຊື້-ຂາຍເຫຼັກເສດທີ່ຜິດກົດໝາຍ

ໃນໄລຍະຜ່ານມາ, ໜ່ວຍງານວິຊາສະເພາະ ກອງບັນຊາການ ປກສ ເມືອງໄຊທານີ ນະຄອນຫຼວງວຽງຈັນ ໄດ້ກວດກາພົບເຫັນບັນດາຫົວໜ່ວຍທຸລະກິດ ຮ້ານຊື້-ຂາຍເຫຼັກເສດ ທີ່ມີການເຄື່ອນໄຫວກະທຳຜິດຕໍ່ຂໍ້ກຳນົດ, ລະບຽບກົດໝາຍ, ແຈ້ງການ ແລະ ດຳລັດຕ່າງໆ ທັງໝົດ 35 ຄົນ ຍິງ 4 ຄົນ; ໃນນີ້, ໄດ້ສຶກສາອົບຮົມ 7 ຄັ້ງ, ມີ 7 ຄົນ ຍິງ 2 ຄົນ, ສົ່ງໃຫ້ ຫ້ອງສັນຕິບານ ປກສ ນະຄອນຫຼວງວຽງຈັນ ດໍາເນີນຄະດີ 28 ຄົນ ຍິງ 2 ຄົນ. ນອກນີ້, ຍັງສາມາດຈັບຕົວຜູ້ເຄື່ອນໄຫວຊື້ຊັບຜິດກົດໝາຍ ທັງໝົດ 6 ຄົນ ແລະ ກໍາລັງດໍາເນີນການສືບສວນ-ສອບສວນ.

ພັທ ວິນິດສັກ ຄໍາຟອງວົງພາ ຮອງຫົວໜ້າພະແນກສັນຕິບານ ກອງບັນຊາການ ປກສ ເມືອງໄຊທານີ ກ່າວວ່າ:

ເພື່ອຮັບປະກັນໃຫ້ບັນດາຫົວໜ່ວຍທຸລະກິດ ຮ້ານຊື້-ຂາຍເຫຼັກເສດ ຢູ່ພາຍໃນປະຕິບັດຕາມລະບຽບກົດໝາຍຂອງລັດ, ຂໍ້ກຳນົດ, ແຈ້ງການ, ຄຳສັ່ງ, ດຳລັດຕ່າງໆຂອງຂັ້ນເທິງວາງອອກ ແລະ ໃຫ້ຫົວໜ່ວຍທຸລະກິດຮັບຊື້ເຫຼັກເສດ ເຂົ້າໃຈ ແລະ ປະຕິບັດຕາມລະບຽບຫຼັກການ ຂອງການດໍາເນີນທຸລະກິດຢູ່ ສປປ ລາວ, ພວກເຮົາຈຶ່ງລົງເຄື່ອນໄຫວຕິດຕາມ, ກວດກາ, ເກັບກຳສະຖິຕິບັນດາຫົວໜ່ວຍທຸລະກິດ ຮ້ານຊື້-ຂາຍເຫຼັກເສດທົ່ວເມືອງໄຊທານີ ໃນໄລຍະ 1 ປີຜ່ານມາ ໂດຍປະສານສົມທົບກັບ ປກສ ກຸ່ມ ແລະ ອຳນາດການປົກຄອງບ້ານ ເຫັນວ່າ ໜ່ວຍງານວິຊາສະເພາະ ສາມາດເກັບກໍາບັນດາຮ້ານຊື້-ຂາຍເຫຼັກເສດທົ່ວເມືອງໄຊທານີ ໄດ້ທັງໝົດ 72 ຮ້ານ; ໃນນີ້, ເປັນຮ້ານຂອງຄົນຫວຽດນາມ ຈຳນວນ 54 ຮ້ານ ແລະ ເປັນຮ້ານຂອງຄົນລາວ 18 ຮ້ານ.

ເຊິ່ງທຸລະກິດຮ້ານຊື້-ຂາຍເຫຼັກເສດຂອງຄົນຕ່າງປະເທດ ໂດຍສະເພາະຄົນຫວຽດນາມ ກວມເອົາ 85% ຂອງຫົວໜ່ວຍທຸລະກິດທັງໝົດ; ສະນັ້ນ, ເພື່ອເຮັດໃຫ້ບັນດາປະກົດການຫຍໍ້ທໍ້ຕ່າງໆທາງສັງຄົມ ຫຼຸດໜ້ອຍຖອຍລົງເທື່ອລະກ້າວ ແລະ ເຮັດໃຫ້ທົ່ວເມືອງໄຊທານີ ມີຄວາມສະຖຽນລະພາບທາງດ້ານການເມືອງ, ມີຄວາມເປັນລະບຽບຮຽບຮ້ອຍທາງສັງຄົມ ແລະ ມີຄວາມສະຫງົບປອດໄພ 100%, ກອງບັນຊາການ ປກສ ເມືອງໄຊທານີ ຈຶ່ງເຊີນເອົາບັນດາຫົວໜ່ວຍດັ່ງກ່າວ ເຂົ້າມາເຮັດບົດບັນທຶກສັນຍາປ້ອງກັນຄວາມສະຫງົບ ແລະ ຫາກໃນຕໍ່ໜ້າ ຫາກຍັງມີການລະເມີດ ເມື່ອກວດພົບເຫັນຈະໃຊ້ມາດຕະການເດັດຂາດຕໍ່ຫົວໜ່ວຍນັ້ນທັນທີ.

ໃນໄລຍະຜ່ານມາ, ຈາກການກວດກາ ພົບເຫັນຄົນຕ່າງປະເທດທີ່ມາອາໄສຢູ່ເຂດເມືອງໄຊທານີ ຍັງມີການປະກອບອາຊີບ ຫຼື ລະເມີດລະບຽບກົດໝາຍ ດັ່ງນີ້:

ປຶ້ມພາດສະປອດໝົດກຳນົດ, ເຮັດວຽກບໍ່ຖືກສະຖານທີ່, ບໍ່ມີວີຊາ LA-Bad, ບໍ່ມີບັດອະນຸຍາດພັກເຊົາ, ບໍ່ມີບັດອະນຸຍາດເຮັດວຽກ, ບໍ່ມີໃບອະນຸຍາດດຳເນີນທຸລະກິດ, ເຄື່ອນໄຫວຊື້-ຂາຍບໍ່ຖືກໂມງເວລາ ເຊັ່ນ: ຊື້-ຂາຍເວລາກາງຄືນ ແລະ ເຊົ່າສະຖານທີ່ບໍ່ຖືກຕ້ອງ (ບໍ່ຖືກຕາມລະບຽບກົດໝາຍລະບຸໄວ້); ຮ້າຍແຮງໄປກວ່ານີ້, ຍັງມີການເຄື່ອນໄຫວກະທຳຜິດກົດໝາຍອາຍາ (ມາດຕາ 244) ຂອງປະມວນກົດໝາຍອາຍາ ສະບັບປັບປຸງ ປີ 2017 ໃນສະຖານຊື້-ຂາຍຊັບຜິດກົດໝາຍ ເຊິ່ງມີທັງໝົດ 6 ກໍລະນີ ຄື:

1. ໃນຊ່ວງເດືອນມິຖຸນາ 2022 ໄດ້ດຳເນີນຄະດີຕໍ່ ທ້າວ ແລຟູຈຽນ ອາຍຸ 31 ປີ, ອາຊີບຄ້າຂາຍ, ສັນຊາດຫວຽດນາມ, ພັກເຊົາຢູ່ບ້ານໄຊສົມບູນ ເມືອງໄຊທານີ, ຜູ້ກ່ຽວໄດ້ກະທໍາຜິດໃນຖານຊື້-ຂາຍຊັບຜິດກົດໝາຍ ເຊັ່ນ ຊື້ກົງເຕີນໍ້າປະປາທີ່ຄົນຮ້າຍລັກມາ.

2. ໃນຊ່ວງເດືອນພຶດສະພາ 2021 ໄດ້ດຳເນີນຄະດີຕໍ່ ທ້າວ ຟາມດືກກັອກ ອາຍຸ 30 ປີ ເຈົ້າຂອງຮ້ານຊື້-ຂາຍເຫຼັກເສດ, ສັນຊາດຫວຽດນາມ, ພັກເຊົາຢູ່ບ້ານດົງສ້າງຫີນ ເມືອງໄຊທານີ, ຜູ້ກ່ຽວໄດ້ກະທຳຜິດໃນຖານຊື້-ຂາຍຊັບຜິດກົດໝາຍ ໂດຍໄດ້ຊື້ສາຍໄຟຟ້າທີ່ຄົນຮ້າຍລັກມາແຕ່ບ່ອນກໍ່ສ້າງສະຖານີລົດໄຟ.

3. ໃນຊ່ວງເດືອນສິງຫາ 2021 ໄດ້ດໍາເນີນຄະດີຕໍ່ ນາງ ບຸດຕີບ່າວ ອາຍຸ 54 ປີ ເຈົ້າຂອງຮ້ານຮັບຊື້ເຫຼັກເສດ, ສັນຊາດຫວຽດນາມ, ພັກເຊົາຢູ່ບ້ານໂຄກສີວິໄລ ເມືອງໄຊທານີ, ຜູ້ກ່ຽວໄດ້ກະທຳຜິດໃນຖານຊື້-ຂາຍຊັບຜິດກົດໝາຍ ໂດຍໄດ້ຊື້ເຫຼັກທີ່ຄົນຮ້າຍລັກມາແຕ່ໂຮງງານຕັງຈະເລີນ.

.ໃນຊ່ວງເດືອນສິງຫາ 2021 ໄດ້ດຳເນີນຄະດີຕໍ່ ທ້າວ ລາຍວັນຫງຽນ ອາຍຸ 38 ປີ ເຈົ້າຂອງຮ້ານຊື້-ຂາຍເຫຼັກເສດ ສັນຊາດຫວຽດນາມ, ພັກເຊົາຢູ່ບ້ານໂຄນສີວິໄລ ເມືອງໄຊທານີ, ຜູ້ກ່ຽວໄດ້ກະທໍາຜິດໃນຖານຊື້-ຂາຍຊັບຜິດກົດໝາຍ ເຊັ່ນ ຊື້ເຫຼັກທີ່ຄົນຮ້າຍລັກມາແຕ່ໂຮງງານຕັງຈະເລີນ.
5. ໃນຊ່ວງເດືອນກັນຍາ 2021 ໄດ້ດໍາເນີນຄະດີຕໍ່ ທ້າວ ເພີນ ອາຍຸ 38 ປີ, ເຈົ້າຂອງຮ້ານຊື້-ຂາຍເຫຼັກເສດ ສັນຊາດຫວຽດນາມ, ພັກເຊົາຢູ່ບ້ານຫ້ວຍເກີບ ເມືອງໄຊນານີ, ຜູ້ກ່ຽວໄດ້ກະທຳຜິດໃນຖານຊື້-ຂາຍຊັບຜິດກົດໝາຍ ຄື: ຊື້ເຫຼັກທີ່ຄົນຮ້າຍລັກມາແຕ່ບ້ານໂນນແສງຈັນ ເມືອງໄຊທານີ.

6. ໃນຊ່ວງເດືອນກັນຍາ 2021 ໄດ້ດຳເນີນຄະດີຕໍ່ ທ້າວ ຫງຽນວັນຕັວນ ອາຍຸ 38 ປີ ເຈົ້າຂອງຮ້ານຊື້-ຂາຍເຫຼັກເສດ ສັນຊາດຫວຽດນາມ, ພັກເຊົາຢູ່ບ້ານໜອງວຽງຄຳ ເມືອງໄຊທານີ, ຜູ້ກ່ຽວໄດ້ກະທຳຜິດໃນຖານຊື້-ຂາຍຊັບຜິດກົດໝາຍ ໂດຍຜູ້ກ່ຽວໄດ້ຊື້ເຫຼັກທີ່ຄົນຮ້າຍລັກມາ.

ນອກຈາກການກະທໍາຜິດໃນການຊື້-ຂາຍແລ້ວ, ຍັງມີປະກົດການຫຍໍ້ທໍ້ອື່ນໆເກີດຂຶ້ນໃນສັງຄົມ ເປັນຕົ້ນຄື: ກຸ່ມໄວລຸ້ນຍັງມີການເຄື່ອນໄຫວລັກເລັກຂະໂມຍນ້ອຍ ເຊັ່ນ: ລັກເຫຼັກ, ໝໍ້ໄຟ, ກົງເຕີນໍ້າ ແລະອື່ນໆ ນຳໄປຂາຍຕໍ່ຮ້ານ-ຂາຍເຫຼັກເສດ ແລະ ຮ້ານຊື້-ຂາຍເຫຼັກເສດຈຳນວນໜຶ່ງ ຍັງສວຍໃຊ້ສະຖານທີ່ຂອງຕົນ ເປັນບ່ອນມົ້ວສຸມຢາເສບຕິດ ແລະ ຫຼິ້ນການພະນັນທີ່ຕ້ອງຫ້າມ.

ການຈັດຕັ້ງປະຕິບັດໃນຕໍ່ໜ້າຂອງກຳລັງວິຊາສະເພາະ ກອງບັນຊາການ ປກສ ເມືອງໄຊທານີ ແມ່ນຈະສືບຕໍ່ປະຕິບັດ ແລະ ນຳໃຊ້ມາດຕະການຕໍ່ຜູ້ລະເມີດຕາມລະບຽບກົດໝາຍ, ດໍາລັດ, ແຈ້ງການ, ຂໍ້ຕົກລົງ ແລະ ນິຕິກຳອື່ນໆທີ່ກ່ຽວຂ້ອງ.

ພ້ອມນີ້, ຈະສືບຕໍ່ຫັນເອົາພະນັກງານວິຊາສະເພາະ ປະສານສົມທົບກັບ ປກສ ກຸ່ມບ້ານ ເຄື່ອນໄຫວຽກງານວິຊາສະເພາະ ໂດຍເອົາພື້ນທີ່ບ້ານເປັນບ່ອນຈັດຕັ້ງປະຕິບັດແຜນການຕົວຈິງ, ແກ້ໄຂບັນດາປະກົດການຫຍໍ້ທໍ້ໃຫ້ຫຼຸດລົງເທື່ອລະກ້າວ ແລະ ຈະສືບຕໍ່ກວດກາ, ຕິດຕາມ ຫຼັງຈາກທີ່ເຮັດບົດບັນທຶກສັນຍາປ້ອງກັນຄວາມສະຫງົບ ກັບ ບັນດາຫົວໜ່ວຍທຸລະກິດຮັບຊື້-ຂາຍເຫຼັກເສດ ສໍາເລັດ, ເຊິ່ງຖ້າຫາກຍັງມີການເຄື່ອນໄຫວທີ່ລະເມີດລະບຽບການຕ່າງໆ ທີ່ລະບຸໄວ້ໃນສັນຍາ ຫຼື ບໍ່ລະບຸ ແມ່ນຈະໃຊ້ມາດຕະການແກ້ໄຂເດັດຂາດ ກັບຫົວໜ່ວຍທີ່ກະທໍາຜິດໂດຍບໍ່ມີຂໍ້ຍົກເວັ້ນ.

Leave a comment

อีเมลของคุณจะไม่แสดงให้คนอื่นเห็น

error: Content is protected !!