ພາຍຸ ມາອອນ ກະທົບ 4 ເມືອງ ພົນລະເມືອງກວ່າ 2.000 ຄົນໃນແຂວງອຸດົມໄຊ

ໄພທຳມະຊາດທີ່ມາກັບການມາຂອງພາຍຸລະດູຮ້ອນ ມາອອນ ໃນຄັ້ງວັນທີ 26 ສິງຫາ 2022 ຢູ່ແຂວງອຸດົມໄຊເຮັດເກີດມີຝົນຕົກຕິດຕໍ່ກັນຫຼາຍຊົ່ວໂມງ ກໍ່ໃຫ້ເກີດນ້ຳປ່າໄຫຼຊຸແຮງ ແລະສ້າງຄວາມເສຍຫາຍຢ່າງໜັກໜ່ວງໃຫ້ແກ່ປະຊາຊົນໃນ 4 ເມືອງ

ໂດຍສະເພາະຜູ້ທີ່ທີ່ອາໄສຢູ່ຕາມແຄມນ້ຳກໍ ເມືອງໄຊ, ນ້ຳພາກເມືອງຫຼາ, ນ້ຳແຊ ເມືອງນາໝໍ້, ນ້ຳຫ້ວຍຊານ ເມືອງງາ ເຮັດໃຫ້ພື້ນຖານໂຄງລ່າງ, ເຮືອນຊານບ້ານຊ່ອງ, ຊັບສິນ, ພື້ນທີ່ການຜະລິດໄດ້ຮັບຜົນກະທົບ ລະບົບໄຟຟ້າ, ນ້ຳປະປາ, ການສື່ສານບໍ່ສາມາດໃຊ້ການໄດ້.

ເຫດການຄັ້ງນີ້ໄດ້ສ້າງຄວາມຫຍຸ້ງຍາກຂາດເຂີນໃຫ້ແກ່ປະຊາຊົນເປັນຕົ້ນເຂົ້າກິນ, ນ້ຳກິນ, ຢາປົວພະຍາດ, ທີ່ພັກອາໄສຊົ່ວຄາວ ເຄື່ອງນຸ່ງຫົ່ມຕ່າງໆ ເຊິ່ງເປັນການຖ່ວງດືງການພັດທະນາເສດຖະກິດ-ສັງຄົມຂອງແຂວງ, ເມືອງຢ່າງຫຼີກລຽງບໍໄດ້.

ຕາມລາຍງານຈາກ ທ່ານນາງ ໄຊສະຫວັນ ນັນທະໄຊ ຫົວໜ້າພະແນກແຮງງານ ແລະສະຫວັດດີການສັງຄົມ ແຂວງອຸດົມໄຊ, ຮອງປະທານຄະນະກຳມະການຄຸ້ມຄອງໄພພິບັດຂັ້ນແຂວງ ໃນວັນທີ 28 ສິງຫາ 2022 ໃຫ້ຮູ້ວ່າ: ຕາມຂໍ້ມູນທີ່ເກັບກຳໄດ້ໃນເບືຶ້ອງຕົ້ນ4 ເມືອງທີ່ໄດ້ຮັບຜົນກະທົບແມ່ນມີ 25 ບ້ານ, 469 ຫຼັງຄາເຮືອນ,

ມີພົນລະເມືອງ 2.324 ຄົນ ຍິງ 900 ຄົນ, ເສຍຊີວິດ 2 ຄົນ, ບາດເຈັບ 3 ຄົນ ມີເຮືອນທີ່ໄດ້ຮັບຜົນກະທົບໜັກຈຳນວນ 66 ຫຼັງ ໃນນັ້ນຖືກນ້ຳຊຸພັດໄປ 58 ຫຼັງ, ດິນເຊາະເຈື່ອນ 2 ຫຼັງ ແລະເລົ້າເຂົ້າໄຫຼໄປກັບນ້ຳ 23 ຫຼັງ.

ພ້ອມດຽວກັນນີ້ຍັງມີເສົາໄຟຟ້າ 12 ແມັດເສຍຫາຍ 301 ຕົ້ນ, ດອກກັນໄຟເສຍຫາຍ 327 ດອກ ແລະສາຍໄຟເສຍຫາຍ 24.900 ແມັດ ສ່ວນຖະໜົນຫົນທາງແມ່ນມີນ້ຳຖ້ວມອັ່ງຫຼາຍຈຸດ ເສັ້ນທາງເລກທີ 2E ເມືອງໄຊຫາເມືອງງາລະຫວ່າງກິໂລແມັດ 15-24 ຖືກຕັດຂາດ 4 ຈຸດ, ຂົວຖືກຕັດຂາດ 4 ແຫ່ງ, ເປ່ເພ 3 ແຫ່ງ ດິນເຈື່ອນຖົມທາງ 15 ຈຸດມີເສັ້ນທາງຊົນນະບົດຖືກເປ່ເພແລະຂົວຖືກຕັດ 11 ແຫ່ງ.

ເພື່ອໃຫ້ການຊ່ວຍເຫຼືອໃນເບື້ອງຕົ້ນແກ່ຜູ້ປະສົບໄພພິບັດຄັ້ງນີ້ ຄະນະກຳມະການຄຸ້ມຄອງໄພພິບັດຂັ້ນແຂວງໄດ້ໃຫ້ການຊີ້ນຳ ບັນດາເມືອງໂດຍສະເພາະແມ່ນຄະນະກຳມະການຄຸ້ມແຄງໄພພິບັດ ແລະພາກສ່ວນຕ່າງໆໃນການຕອບໂຕ້ເຫດການສຸກເສີນໄພພິບັດໃນ 4 ເມືອງຄື

ລະດົມກຳລັງພົນຈາກກອງບັນຊາການ ປກສ, ປກຊ ແລະຊາວໜຸ່ມຕະລຸມບອນລົງໃຫ້ການຊ່ວຍເຫຼືອຍ້າຍປະຊາຊົນ, ເຄື່ອງຂອງຄົວເຮືອນ ແລະອະນາໄມເຮືອນຊານບ້ານຊ່ອງໃນ 3 ເມືອງຄືເມືອງໄຊ, ເມືອງຫຼາ, ແລະເມືອງນາໝໍ້ ພ້ອມທັງຄົ້ນຫາຜູ້ສູນຫາຍ, ສັນລະສູດສົບຜູ້ເສຍຊີວິດຢູ່ເມືອງຫຼາ ສຳລັບເມືອງງາແມ່ນເສຍຫາຍແຕ່ພື້ນທີ່ການຜະລິດ.

ຈາກນີ້ຍັງໄດ້ນຳເອົາເຂົ້າສານອາຫານແຫ້ງໄປຊ່ວຍເຫຼືອເບື້ອງຕົ້ນປະກອບມີ ເຂົ້າສານໜຽວ 105 ກິໂລ, ໝີ່ 7 ແກັດ, ນ້ຳດື່ມ 400 ແພັກ, ເຄື່ອງບໍລິໂພກແບບປະສົມຈຳນວນ 7 ເປົາ ແລະເກືອ 12 ຖົງໄປຊ່ວຍ 7 ຫຼັງຄາເຮືອນ ພ້ອມຊີ້ນຳໃຫ້ບັນດາຂະແໜງການກ່ຽວຂ້ອງຮີບຮ້ອນແກ້ໄຂສຸກເສີນສິ່ງທີ່ຈຳເປັນເຊັ່ນ ຖະໜົນຫົນທາງ, ລະບົບໄຟຟ້າ, ນ້ຳປະປາ, ນ້ຳລິນ ແລະການສື່ສານອື່ນໆໃຫ້ສາມາດໃຊ້ການໄດ້ໂດຍພື້ນຖານໄວທີ່ສຸດ.

ສຳລັບມູນຄ່າຄວາມເສຍຫາຍຈາກໄພທຳມະຊາດຄັ້ງນີ້ແມ່ນຍັງບໍ່ສາມາດປະເມີນໄດ້ເທື່ອ ມີພຽງເມືອງນາໝໍ້ປະເມີນເບື້ອງຕົ້ນຄວາມເສຍຫາຍບໍ່ຕ່ຳກວ່າ 6,2 ຕື້ກີບ, ສ່ວນລາຍລະອຽດເມືອງອື່ນໆມີຄວາມເສຍຫາຍຫຼາຍໜ້ອຍພຽງໃດ ທີມຂ່າວເສດຖະກິດ-ການຄ້າຈະລາຍງານຕື່ມເປັນແຕ່ລະໄລຍະ.

Leave a comment

อีเมลของคุณจะไม่แสดงให้คนอื่นเห็น

error: Content is protected !!