ຕຳຫຼວດ ປກສ ເມືອງສີງ ແຂວງຫຼວງນ້ຳທາ ຈັບເມຍແລະຊາຍຊູ້ທີ່ວາງແຜນຮ່ວມກັບຊູ້ ຫວັງຄາດຕະກຳຜົວຕົນເອງ

ຕາມການລາຍງານຂອງທ່ານ ພັຕ ອານຸສອນ ໄຊດວງຕາ ຮອງຫົວໜ້າພະແນກຕຳຫຼວດ ປກສ ເມືອງສີງ ໃຫ້ຮູ້ວ່າ: ບັນຫາສັງຄົມຊູ້ສາວ ກໍ່ແມ່ນປະກົດການຫຍໍ້ທໍ້ໜຶ່ງ ທີ່ມັກເກີດຂື້ນໃນສັງຄົມ ເຊິ່ງມັນໄດ້ແຕະຕ້ອງເຖິງກຽດສັກສີ ເຄືອຍາດວົງຕະກຸນ, ຜິດຕໍ່ວັດທະນາທຳຮີດຄອງປະເພນີອັນດີງາມ, ຜິດຕໍ່ລະບຽບກົດໝາຍຂອງບ້ານເມືອງ ເຮັດໃຫ້ຄອບຄົວບໍ່ມີຄວາມສະຫງົບສຸກ, ລູກເຕົ້າຂາດຄວາມອົບອຸ່ນ ຈາກຜູ້ປົກຄອງ.

ດັ່ງລາຍຄະດີທີ່ເກີດຂື້ນຢູ່ ບ້ານນໍ້າມະອຸ່ນ ເມືອງສິງ ແຂວງຫຼວງນ້ຳທາ ໃນຄັ້ງວັນທີ 24 ມິຖຸນາ 2022 (ເມຍວາງແຜນຮ່ວມກັບຊູ້ ຫວັງຄາດຕະກຳຜົວຕົນເອງ) ພາຍຫຼັງເກີດເຫດ ກໍ່ໄດ້ລົງກວດກາສະຖານທີ່ ພ້ອມທັງນຳຕົວ ທ້າວ ຕໍພຽວ ຜູ້ຖືກເຄາະຮ້າຍສົ່ງໄປເຂົ້າໂຮງໝໍ ເມືອງສີງ ເນື່ອງຈາກວ່າຜູ້ກ່ຽວ ມີຮ່ອງຮອຍບາດແພລູກປືນຍິງເຂົ້າບໍລິເວນກົກຂາເບື້ອງຊ້າຍ 2 ລູກ, ນີ້ວມືເບື້ອງຂວາ 1 ລູກ, ບໍລິເວນຂ້າງເບື້ອງຊ້າຍ 3 ລູກ, ຫົວນົມເບື້ອງຂວາ 2 ລູກ ແລະ ຂະໝັບຫູເບື້ອງຂວາ 3 ລູກ. ພ້ອມດຽວກັນນັ້ນ, ກໍໄດ້ຂຶ້ນເປົ້າໝາຍຕິດຕາມຮ່ວມກັບ ປກສ ກຸ່ມບ້ານນ້ຳແກ້ວຫຼວງ ຮອດວັນທີ 27 ມິຖຸນາ 2022 ຈຶ່ງສາມາດກັກຕົວຜູ້ກໍ່ເຫດໄດ້ 02 ຄົນ, ທ້າວ ແຊຈ່າ ອາຍຸ 28 ປີ (ຊາຍຊູ້) ແລະ ນາງ ສໍຈົມ ອາຍຸ 33 ປີ (ເມຍຂອງ ທ້າວ ຕໍພຽວ ຜູ້ຖືກເຄາະຮ້າຍ) ທັງສອງຢູ່ ບ້ານນ້ຳມະອຸ່ນ ເມືອງສິງ ແຂວງຫຼວງນ້ຳທາ.

ຜ່ານການສອບສວນຂອງເຈົ້າໜ້າທີ ນາງ ສໍຈົມ ໄດ້ຮັບສາລະພາບວ່າ: ຕົນເອງ ແລະ ທ້າວຕໍພຽວ ໄດ້ສ້າງຄອບຄົວ ແລະ ຢູ່ຮ່ວມກັນຖືກຕ້ອງຕາມຮີດຄອງປະເພນີ ແຕ່ປີ 2006 ແຕ່ບໍ່ສາມາດມີລູກນຳກັນ ຍ້ອນສຸຂະພາບບໍ່ແຂງແຮງ ຮອດປີ 2016 ທ້າວ ຕໍພຽວ ຜູ້ເປັນຜົວເລີ່ມມີການພົວພັນກັບຢາເສບຕິດ ສູບຢາຝິ່ນ, ເສບຢາບ້າຫຼາຍຂຶ້ນທຸກມື້ ບໍ່ພາເຮັດພາສ້າງ ເວລາບໍ່ມີຢາຈະເສບກໍ່ຮ້າຍດ່າຕົນເອງ ພ້ອມທັງບັງຄັບໃຫ້ໄປຊອກຢືມເງິນນຳພີ່ນ້ອງມາໃຫ້ ຖ້າປະຕິເສດກໍຈະຖືກທຸບຕີທໍລະມານ, ມີບາງຄັ້ງໄດ້ຮັບບາດເຈັບຈົນໄດ້ໄດ້ເຂົ້າໂຮງໝໍ, ຢາກປະຮ້າງ ແຕ່ຜູ້ເປັນຜົວພັດບໍ່ຍີນຍອມ.

ຈາກນັ້ນ, ຕົນເອງຈຶ່ງເກີດມີແນວຄິດເບື່ອໜ່າຍກັບຜົວ ແລະ ລັກຫຼີ້ນຊູ້ຮ່ວມກັນຫຼັບນອນກັບ ທ້າວ ແຊຈ່າ ຄົນບ້ານດຽວກັນ ມາໄດ້ຫຼາຍຄັ້ງ ຮອດປີ 2021 ຈຶ່ງໄດ້ວາງແຜນຮ່ວມກັບຊາຍຊູ້ ເອົານ້ຳກົດປະສົມກັບອາຫານ ໃຫ້ ທ້າວ ຕໍພຽວ ຜູ້ເປັນຜົວກີນ ແຕ່ບໍ່ເປັນຫຍັງ. ວັນທີ 24 ມິຖຸນາ 2022 ຈຶ່ງໄດ້ວາງແຜນໃໝ່ ໂດຍໃຫ້ ທ້າວ ແຊຈ່າ ເອົາປືນແກັບໄປຍິງໃນຄະນະທີ່ ທ້າວ ຕໍພຽວ ຜູ້ເປັນຜົວ ກຳລັງໄຖ່ນາຢູ່ເຂດ ຫ້ວຍນ້ຳມະອຸ່ນ ແຕ່ຜູ່ກ່ຽວກໍ່ບໍ່ຕາຍ ຕໍ່ມາຈຶ່ງຖືກເຈົ້າໜ້າທີຈັບຕົວທັງສອງມາດຳເນີນຄະດີ.
ສະຫາຍ ພັຕ ອານຸສອນ ໄຊດວງຕາ ໃຫ້ຮູ້ຕື່ມອີກວ່າ: ປັດຈຸບັນ ນາງ ສໍຈົມ ແລະ ທ້າວ ແຊຈ່າ ຜູ້ຖືກຫາທັງສອງ ທາງເຈົ້າໜ້າທີ ປກສ ເມືອງສີງ ໄດ້ສົ່ງໃຫ້ພະແນກກ່ຽວຂ້ອງ ກອງບັນຊາການ ປກສ ແຂວງຫຼວງນ້ຳທາ ເພື່ອດຳເນີນຄະດີຕາມລະບຽບກົດໝາຍ.

ຈາກ: ສະຖານີວິທະຍຸກະຈາຍສຽງ ເມືອງສິງ ແຂວງຫຼວງນໍ້າທາ

Leave a comment

อีเมลของคุณจะไม่แสดงให้คนอื่นเห็น

error: Content is protected !!