ຊົມເຊີຍ ! ໂຄງການກໍ່ສ້າງຊົນລະປະທານຕົວແບບ “ນ້ຳກະຕະ” ໄດ້ສໍາເລັດການກໍ່ສ້າງ 100% ດ້ວຍຄຸນນະພາບສູງ !!!

ຊົມເຊີຍ ! ໂຄງການກໍ່ສ້າງຊົນລະປະທານຕົວແບບ “ນ້ຳກະຕະ” ໄດ້ສໍາເລັດການກໍ່ສ້າງ 100% ດ້ວຍຄຸນນະພາບສູງ !!!

ໂຄງການກໍ່ສ້າງຊົນລະປະທານຕົວແບບ “ນໍ້າກະຕະ” ມີທີ່ຕັ້ງຢູ່ເມືອງບົວລະພາ, ແຂວງຄຳມ່ວນ ແມ່ນໄດ້ຮັບທຶນຊ່ວຍເຫຼືອຈາກອົງການພັດທະນາປະເທດຝຣັ່ງ (AFD) ໃນມູນຄ່າ 4 ລ້ານ 5 ແສນໂດລາສະຫະລັດ; ໂດຍແມ່ນ ບໍລິສັດ ອິນຊີ ພັດທະນາກໍ່ສ້າງ ຈໍາກັດ ເປັນຜູ້ຮັບເໝົາກໍ່ສ້າງ.

ພາຍຫຼັງທີ່ໄດ້ເຊັນສັນຍາ ແລະ ດໍາເນີນການຈັດຕັ້ງປະຕິບັດມາແຕ່ທ້າຍປີ 2020 ຮອດປັດຈຸບັນແມ່ນສໍາເລັດ 100%. ຫຼ້າສຸດ, ໃນວັນທີ 19 ສິງຫາ 2022 ຜ່ານມາ ໄດ້ຈັດພິທີມອບ-ຮັບຢ່າງເປັນທາງການ.

ໂດຍໃຫ້ກຽດເຂົ້າຮ່ວມໃນພິທີມອບ-ຮັບໂຄງການດັ່ງກ່າວ ຂອງທ່ານເຈົ້າແຂວງໆຄຳມ່ວນ, ມີຜູ້ຕາງໜ້າຈາກອົງການພັດທະນາປະເທດຝຣັ່ງ, ທ່ານຫົວໜ້າກົມຊົນລະປະທານ ກະຊວງກະສິກໍາ ແລະ ປ່າໄມ້, ທ່ານຫົວໜ້າພະແນກກະສິກຳ ແລະ ປ່າໄມ້ແຂວງຄຳມ່ວນ, ການນຳເມືອງບົວລະພາ, ຜູ້ບໍລິຫານຂອງບໍລິສັດ ແລະ ແຂກຖຶກເຊີນເຂົ້າຮ່ວມ.

ໃນພິທີ ທ່ານ ແຫຼວຄຳ ວົງສາວັນທອງ, ຜູ້ອຳນວຍການໃຫຍ່ ບໍລິສັດອິນຊີ ພັດທະນາກໍ່ສ້າງ ຈຳກັດ ໄດ້ຂຶ້ນລາຍງານໂດຍຫຍໍ້ ກ່ຽວກັບໂຄງການກໍ່ສ້າງຊົນລະປະທານຕົວແບບນໍ້າກະຕະ ວ່າ: ໂຄງການດັ່ງກ່າວ ແມ່ນໄດ້ຮັບທຶນຊ່ວຍເຫຼືອຈາກອົງການພັດທະນາປະເທດຝຣັ່ງ (AFD) ໃນມູນຄ່າ 4 ລ້ານ 5 ແສນໂດລາສະຫະລັດ, ໄດ້ຜ່ານການສໍາຫຼວດ-ອອກແບບ ແລະ ຄຸມງານກໍ່ສ້າງໂດຍບໍລິສັດຈາກປະເທດຝຣັ່ງ ໂດຍຜ່ານການປະມູນເປີດກ້ວາງ, ມີການກວດສອບຈາກຜູ້ໃຫ້ທຶນ ແລະ ຄະນະກຳມະການຈາກຝຣັ່ງ.

ຜ່ານການປະມູນເປີດກ້ວາງ ແມ່ນບໍລີສັດອີນຊີ ພັດທະນາກໍ່ສ້າງ ຈໍາກັດ ເປັນຜູ້ຊະນະເລີດໃນວັນທີ 7 ກໍລະກົດ 2020 ແລະ ວັນທີ 11 ພະຈິກ 2020 ໄດ້ມີພິທີເຊັນສັນຍາ ເພື່ອການກໍ່ສ້າງໂຄງການຊົນລະປະທານຕົວແບບ “ນໍ້າກະຕະ” ເມືອງບົວລະພາ, ແຂວງຄໍາມ່ວນ ລະຫວ່າງ ກົມຊົນລະປະທານ, ກະຊວງກະສິກໍາ ແລະ ປ່າໄມ້ ແລະ ບໍລິສັດ ອິນຊີ ພັດທະນາກໍ່ສ້າງ ຈໍາກັດ ພາຍຫຼັງເຊັນຍາ ບໍລິສັດໄດ້ເລີ່ມລົງມືເຮັດວຽກທັນທີເລີຍ.

ເຊິ່ງໃນໄລຍະປະຕີບັດໂຄງການນັ້ນ ການແຜ່ລະບາດຂອງພະຍາດໂຄວິດ-19 ໄດ້ເຮັດໃຫ້ການເຄື່ອນຍ້າຍແຮງງານ, ກົນຈັກໜັກ, ວັດສະດຸກໍ່ສ້າງ ແລະ ອື່ນໆ ໄດ້ພົບຄວາມຫຍຸ້ງຍາກສົມຄວນ ພ້ອມກັນນັ້ນ ລາຄາວັດສະດຸກໍ່ສ້າງ ແລະ ນໍ້າມັນເຊື້ອໄຟກໍ່ປັບຕົວເພີ່ມຂຶ້ນຫຼາຍເທົ່າໂຕ.

ແຕ່ທາງບໍລິສັດພວກເຮົາບໍ່ໄດ້ທໍ້ຖອຍຕໍ່ບັນຫາ ແລະ ອຸປະສັກດັ່ງກ່າວ. ຂະນະດຽວກັນ, ບໍລິສັດໄດ້ເພີ່ມທຶນຮອນຈໍານວນຫຼາຍ, ກົນຈັກ ແລະ ບຸກຄະລາກອນ ເພື່ອເຮັດໃຫ້ໂຄງການສໍາເລັດຕາມສັນຍາ. ມາຮອດວັນທີ 7 ກໍລະກົດ 2022 ຜ່ານມາ ໂຄງການດັ່ງກ່າວໄດ້ສໍາເລັດ 100% ແລະ ສໍາເລັດກ່ອນສັນຍາປະມານ 2 ເດືອນ.

ໂຄງການກໍ່ສ້າງຊົນລະປະທານຕົວແບບນໍ້າກະຕະ ປະກອບມີ 4 ໜ້າວຽກໃຫຍ່ຄື: ກໍ່ສ້າງຝາຍນໍ້າລົ້ນ; ກໍ່ສ້າງລະບົບຄອງເໝືອງແບບຄົບຊຸດ; ບຸກເບີກເນື້ອທີ່ນາ ແລະ ກໍ່ສ້າງເສັ້ນທາງ; ໂຄງການຊົນລະປະທານນີ້ ແມ່ນມີຄວາມສໍາຄັນຫຼາຍ ເພາະຜູ້ໃຫ້ທຶນມີຈຸດປະສົງສ້າງໃຫ້ເປັນຕົວແບບດ້ານການພັດທະນາ ແລະ ແກ້ໄຂຄວາມທຸກຍາກໃຫ້ແກ່ປະຊາຊົນ 4 ບ້ານ ຈໍານວນ 1,700 ຄອບຄົວ ຢູ່ເມືອງບົວລະພາ ແຂວງຄຳມ່ວນ.

ໃນຕອນທ້າຍພິທີ, ທ່ານເຈົ້າແຂວງຄຳມ່ວນ ກໍ່ໄດ້ກ່າວຄຳປາໄສ ຂໍໃຫ້ພໍແມ່ປະຊາຊົນຊາວເມືອງບົວລະພາ ໂດຍສະເພາະແມ່ນປະຊາຊົນພາຍໃນບ້ານຜູ້ໃດ້ຮັບຜົນປະໂຫຍດ ຈົ່ງຊ່ວຍກັນປົກຮັກສາ, ຄູ້ມຄອງນຳ້ໃຊ້ໂຄງການນີ້ໃຫ້ຍືນຍົງ ແລະ ຍາວນານ.

ອີກເທື່ອແມ່ນຊົມເຊີຍບໍລີສັດ ອິນຊີພັດທະນາກໍ່ສ້າງ ຈໍາກັດ ທີ່ໄດ້ປະຕີບັດສັນຍາດ້ວຍຄວາມຮັບຜິດຊອບສູງ, ສາມາດສະໜອງທືນ, ກົນຈັກ ແລະ ພະນັກງານເຂົ້າໃນໂຄງການໃຫ້ສຳເລັດຕາມສັນຍາດ້ວຍຄຸນນະພາບສູງ.

Leave a comment

อีเมลของคุณจะไม่แสดงให้คนอื่นเห็น

error: Content is protected !!